Rudolf Folkerts, Marienhafe 24.10.1993
Schoonorth (bnk) Dat was di 'n Pläseer in Gerhard Lorenz sien Backeree in Schoonorth, un 'n bäten Uprägen was 't ook, an disse Saterdag-Vörmiddag: Wat sull dat woll worrn, dat mit de "Oll Wiefkes"? Nu, 't is all best verloopen, man dat kunnst vörweg ja neet weeten: Well wuß denn noch van Bescheed aver dat, wat in ollerder Tieden elk un een kennen deh, man nu haast nümms mähr wuß? Watt sünt "Oll Wiefkes" un wo worrn's maakt?
In Ostfreesland harr Lorenz sück an all Ecken un Kanten umhört, harr oll Rezeptbooken to kriegen versöcht un wat weet ick noch all'; 't was hum neet mitloopen. Man bi uns Nahbers in 't Nederland, dor wurr he "fündig", as de Hochdütschen seggen, dor funn he Backers, de noch "Oll Wiefkes" maken kunnen, un de hett he denn na d' Schoonorth nögt, dat se hum 't wiesen muggen.
Saterdag was 't sowiet, de Nederlanders (neet de "Hollanders", as der licht seggt worrt; de wahnen, as de Nederlanders verklaart hemmen, in dat südliche Nederland, in de Kuntraij so bi de Stadt Aachen) na d' Schoonorth kamen, un dor in Gerhard Lorenz sien Backstuuv wurr düchtig wurackt. Dat dürs 'n good Sett, van Mähl un wat der anners noch wäsen mutt offwägen hento de klaare "Oll Wiefkes" ut de Backabent haalen.
Tja, wat sünt denn nu "Oll Wiefkes"?
Dat is 'n heel bisünner Gebacksel, dat 'n froger in elker Backeree kriegen kunn, de 'n bietje wat up sück hollen deh, man dat in uns Tied, 1993, mähr off minner in 't "Vergätelbook" raakt is. Gerhard Lorenz was dat dorum to dohn, dat "Vergätelbook" wär apentorieten un so dat, wat för uns Vörollen sotoräken "normal" was, heruttohahlen un uns to verklaaren, un dat is hum denn je ook mitloopen.
Dor kwammen 'n heel'n Rieg Neesgierigen binanner, ook een van d' "K'rier" stook sien Nös to d' Backstuuv in: Hum was upfallen, dat dor sovööl mähr Autos stunnen as anners woll, un denn muß he je weeten, wat dor los was, un he kreeg sien Oogen haast neet wär dicht (un hett sück glieks in Püüt "Oll Wiefen" reserveeren laaten, versteiht sück, un knipst hett he ook).
Nu is dat je neet so, dat de "Oll Wiefkes" elker Dag to kriegen sünd, nä dat weer woll tovööl verlangt. Man up Bestellung sall Lorenz sück am Enn' doch breet schlahn laaten un sien Backabent mit de "Rohlinge" van de "Oll Wiefkes" vullpacken un hör denn offbacken. He is heel blied, dat he nu van Bescheed weet, wo 't gahn mutt mit dat Backen van de "Oll Wiefkes". Un dat is ja ook wat wärt, off neet?